أشتــــاتا.. أشتــــــــوت

عفوا آيها البنى آدمين .. يرجى أختيار لون ونوع ومقاس السيراميك والخشب والمسامير المناسب لمعده سيادتكم !!

كل يوم يمر علينا فى البلد بنت ال ........... دى نكتشف حاجات عجيبه مره اللحمه فيها طاعون والزرع مسرطن والفراخ عندها انفلونزا ودلوقتى اللبن بقا فيه بودره سيراميك بالذمه ده كلام ايه اللى بيحصل يا جماعه فى البلد خربت من شويه حراميه ما سكنها للاسف وبعدين يعنى مش كفايه اللى حصل بفضيحه الدستور اللى شربناها بالمعلقه زى العلقم يعنى بقت خربانه خربانه من جميع النواحى دى حتى حبيبتنا السودا ( رايس ) قالت فيما معناه يعنى بتعدلوا الدستور ليه عشان تقلبوها دوله بوليسيه ..يا أخى .................

الحياه دلوقتى بقت كلها نقط بس نقط سودا والعياذ بالله تخيلوا بقا لو لغوا كمان النقط هتكون الحياه ازاى .. أحسبوها انتوا بقا والفائز له عندى شويه بودره سيراميك مستورده يستاهلوا معدتكم . بس طبعا بعد تعديل" الباشا دستور" الحياه هتكون مختلفه تماما يعنى ممكن بودره السيراميك كمان يصدروها بره وجوه كمان عشان هتبقى حاجه ثمينه مش زى زمان حاجه ببلاش كده .

ياناس فوقوا بقا من التربه اللى انتوا عايشين فيها دى اهل الكهف انتهوا من زمان ولا انتوا بقيتوا من اخر سلاله اهل الكهف ولا انتوا مستنين الفيزا سيراميك ولا مستنين تتصرف على بطاقه التموين ولا تتضاف على فاتوره الكهربا زى الزباله ولا موأغذا يعنى ،. لا بقا انسوا وبطلوا تحلموا خلاص زمن الاحلام انتهى .، ممكن البنى آدمين اللى بيقروا الكلام ده يقولوا انى معقده او يأست من حياتى لا الحياه حلوه وجامده قوى بس احنا اللى بقينا مش عارفين نعيش فيها عشان ما بقتش لينا .. وبقينا ازاى كده

الناس فى الدنيا صنفين صنف بياخد بودره السيراميك وبيسكت والصنف التانى بياكل العيش بمساميرا وعجبى ..

انا اسفه اكتشفت ان فى صنف تالت صنف ادمن شرب الشاى بنشاره الخشب ولوشرب الشاى ابو فتله باطنوا توجعوا ويروح للنجار .. ويا وطبعا مش اى نجار ده نجار بابا وشباك ونظرا للعيشه الهباب اللى الشباب عايشها ولا عارف يجيب شقه ولا عفش الشقه عشان يتهبب ويتجوز بنصحهم والنصيحه لله انهم يجيبوا شاى بنشاره الخشب والعيش ابو مسامير واللبن اللى فيه بودره سيراميك وبكده هيقدروا يجهزوا شقتهم بأقل التكاليف عشان انبوبتهم تفضى وياخدوا استماره سته يلا لهى باظت ولا خربت ولا جابت جاز لا موأغذا دى عيشه ظريفه جدا على رأى مدحت صالح وعلى للاستفسار ادخل على موقع ( خيبه دوت كوم ) وعلى رأى المثل الشهير " الفرخه كلت بيضها " ياااااااااااااااااااالهوى

لا بقا والمصيبه الكبرى لما تركب الميكروباص الصبح وانت رايح شغلك والميكروباص يقف فجأه ويقابلك بقا بتوع الكارته الصيع اللى مشغالاهم الحكومه ويخدوا الكارته من سوقين الميكوباص وانت تتعطل بقا مش مهم بالذمه يا ناس ده منظر حضارى يشرف بلدنا والله احنا بقينا لا فى مره نسمع انهم عملوا كارته لدخول الحمام ويقفلك موظف حكومه بره باب الحمام ويقولك الكارته يا بيه وياسلام بقا لو مدفعتش هيكون يومك اسود هيشدوا عليك السيفون او يخدوا اللى بالى بالك ..